CRISTINESINA D'UN SOGNU!...
Tu fai mpazziri l'Angiuli e li Santi
cu li to sguardi chi su raggi ardenti.
Puru se ti guardamu assai distanti,
lu sangu ndi sentimu ribullenti!...
L'occhj sunnu du stij a calamita:
cu ndavi a sorta d'essari guardatu,
senti na scossa elettrica nt'a vita
e resta muto comu nu ncantatu…
Li trizzi toi sù comu dù catini,
chi ligano lu cori cu durcizza,
ma lu fannu sentiri nta li spini
se non poti toccari chissa trizza!...
Cu guarda, suspirandu. lu tò visu,
dimentica ogni guai di chista vita:
si senti comu fussi in Paradisu,
nta na paci solenni ed infinita...
Li mani toi su' l'ali di na Fata:
chi tocchi tocchi cangia di culuri:
puro na petra, di tia accarizzata,
s'apri e diventa lu cchjù bellu hjuri....
Undi posi li pedi rinverdisci
la terra e si ricopri di sirinu;
a lu passaggiu toi si fannu lisci
li spini di li rosi d'u giardinu...
La voci tua è na musica divina:
di li to labbra nesci latti e meli!...
Cu ti senti parlari no ndovina
s'è vuci umana opporu di li Celi!...
St'aspra muntagna, cu li so' foresti,
abbraccia stu Pajsi tantu bello....
Di chista Terra la Roggina resti,
di stu Pajsi fulgidu giojellu…
(Luglio 1962) F.Spanò.